DISTRICT: ಬಾಗಲಕೋಟೆ: ಬಾಗಲಕೋಟೆ ನಗರದಲ್ಲಿ ಅಕ್ರಮವಾಗಿ ನಿರ್ಮಾಣ ಮಾಡಲಾಗಿರುವ ಕಟ್ಟಡಗಳ ತೆರವು ಕಾರ್ಯಾಚರಣೆ ಇಂದು ಬೆಳ್ಳಂಬೆಳಗ್ಗೆ ಆರಂಭವಾಗಿದೆ. ಹಳೆ ಅಂಜುಮನ್ ಏರಿಯಾ ಪ್ರದೇಶದಲ್ಲಿ ತೆರವು ಕಾರ್ಯಾಚರಣೆ ನಡೆದ ವೇಳೆ ನಿವಾಸಿಗಳು ಕಣ್ಣೀರು ಹಾಕಿದ ಘಟನೆ ನಡೆದಿದೆ. ಕೆಲವು ಮನೆಗಳ ಮುಂದಿನ ಅತಿಕ್ರಮಣದ ಜಾಗ, ಶೆಡ್​​​ಗಳನ್ನು ತೆರವು ಮಾಡುವ ಕಾರ್ಯಾಚರಣೆ ನಡೆಯಿತು. ಈ ವೇಳೆ ಕೋವಿಡ್​ ಸಂದರ್ಭದಲ್ಲಿ ಇಂತಹ ತೆರೆವು ಕಾರ್ಯಾಚರಣೆ ಏಕೆ..? ಮುಂದೆ ಮಳೆಗಾಲ‌ ಆರಂಭವಾಗುತ್ತಿದೆ, ಎಲ್ಲಿ ಹೋಗೋಣ ಎಂದು ಅಧಿಕಾರಿಗಳ ಎದುರು ಶೆಡ್​​​ನಲ್ಲಿ ವಾಸಿಸುವ ಸ್ಥಳೀಯರು ಕಣ್ಣೀರಿಟ್ಟರು. ಅಲ್ಲದೇ ಸಮಯಾವಕಾಶ ನೀಡುವಂತೆ ಗೋಗರೆಯುತ್ತಿದ್ದ ದೃಶ್ಯಗಳು ಕಂಡು ಬಂದವು. ಬಾಗಲಕೋಟೆ ಪಟ್ಟಣ ಅಭಿವೃದ್ಧಿ ಪ್ರಾಧಿಕಾರ, ನಗರಸಭೆ ಅಧಿಕಾರಿಗಳ ನೇತೃತ್ವದಲ್ಲಿ ಕಾರ್ಯಾಚರಣೆ ನಡೆಯಿತು. ಸ್ಥಳದಲ್ಲಿ ನಗರಸಭೆ ಪೌರಾಯುಕ್ತ ಮುನಿಸ್ವಾಮಿ ಹಾಗೂ ಬಿಟಿಡಿಎ ಅಧಿಕಾರಿಗಳು ಉಪಸ್ಥಿತರಿದ್ದರು.