ENTERTAINMENT: ಕನ್ನಡದಲ್ಲಿ ರೆಬೆಲ್ ಸ್ಟಾರ್ ಎಂದೇ ಕರೆಸಿಕೊಳ್ಳುವ ಹಾಗೂ ಕನ್ನಡ ಚಿತ್ರರಂಗದ ಆಶಾ ದೀಪವಾಗಿದ್ದ ನಟ ದಿವಂಗತ ಅಂಬರೀಷ್ ಅವರ 69ನೇ ಹುಟ್ಟುಹಬ್ಬವನ್ನು ಶನಿವಾರ ಆಚರಿಸಲಾಗುತ್ತಿದೆ. ಚಿತ್ರರಂಗದ ತಮ್ಮ ಕುಟುಂಬ ಹಾಗೂ ಅಪಾರ ಅಭಿಮಾನಿ ಬಳಗವನ್ನು ಹೊಂದಿರುವ ಅಂಬರೀಷ್ ಅವರ ಹುಟ್ಟುಹಬ್ಬ ಅತ್ಯಂತ ಸಡಗರವನ್ನೇ ಹೊಂದಿದೆ‌ಎಂಬುದಕ್ಕೆ ಸಾಮಾಜಿಕ ತಾಣದಲ್ಲಿ ಅವರನ್ನು ನೆನಪಿಸಿಕೊಂಡಿರುವುದೇ ಸಾಕ್ಷಿಯಾಗಿದೆ. ಅಂಬರೀಷ್ ಅಜಾತಶತ್ರು ಎಂಬುದಕ್ಕೂ ಈಗ ನಿದರ್ಶನಗಳು ಸಿಗುತ್ತವೆ. ರಾಜಕೀಯ ಹಾಗೂ ಸಿನಿಮಾ ರಂಗದಲ್ಲಿ ಯಾರಿಗೂ ಸಾಟಿಯಾಗದ ಅಪಾರ ಗೆಳೆಯ ಬಳಗವನ್ನು ಅವರು ಹೊಂದಿದ್ದಾರೆ. ಸಿನಿಮಾದವರ ಪಾಲಿಗಂತೂ ಅವರು ದೇವರ ಸ್ವರೂಪ. ಏಕೆಂದರೆ ಛಲ ಬಿಡದೆ ಕಟ್ಟಿದ ಕಲಾವಿದರ ಸಂಘದ ಭವನ ಹಾಗೂ ಇತರ ವಿಷಯಗಳು ಈಗಿನ ಕಲಾವಿದರಿಗೆ ಆಸರೆಯಾಗಿವೆ. ಅಂಬಿ ಕನ್ನಡ ನೆಲದ ಅನುಪಮ ಹಾಗೂ ವರ್ಣರಂಜಿತ ವ್ಯಕ್ತಿ. ಕರ್ಣ ‌ಎಂದೇ ಕರೆಸಿಕೊಳ್ಳುವ ದಾನಿ ಮತ್ತು ಯುವ ಜನರ ಪ್ರೇರಣೆ. ಅಂತಹ ಅಂಬರೀಷ್ ಅಜರಾಮರವಾಗಲಿ ಎಂಬ ಘೋಷಣೆಯ ಜೊತೆ ಅವರ ಹುಟ್ಟುಹಬ್ಬ ಅರ್ಥಪೂರ್ಣವಾಗುತ್ತಿದೆ.