LIFESTYLE:

ಚೆನೈ: ಆಕೆ ಆಟಿಸಂ ಅಥವಾ ಸ್ವಲೀನತೆ ಸಮಸ್ಯೆಯಿಂದ ಬಳಲುತ್ತಿರುವ ಹುಡುಗಿ. ಆದ್ರೂ ಆಕೆ ಛಲಗಾತಿ. ಆಕೆಯ ಛಲ ಎಂತದ್ದು ಅಂದ್ರೆ ಕೇವಲ 13 ಗಂಟೆಗಳಲ್ಲಿ ಶ್ರೀಲಂಕಾದಿಂದ ತಮಿಳುನಾಡಿಗೆ ಸಮುದ್ರದಲ್ಲಿ ಈಜಿ ದಾಖಲೆ ನಿರ್ಮಿಸಿದ್ದಾಳೆ. ರಾಮೇಶ್ವರಂ ಮತ್ತು ತಲೈಮನ್ನಾರ್ ನಡುವಿನ ಪಾಕ್ ಜಲಸಂಧಿಯಲ್ಲಿ ಈಜಿ ಸಾಧನೆಗೈದಿದ್ದಾಳೆ.

ಮುಂಬೈನಲ್ಲಿರುವ ಭಾರತೀಯ ನೌಕಾ ಅಧಿಕಾರಿ ಮದನ್ ರೈ ಅವರ ಪುತ್ರಿಯಾಗಿರೋ ಜಿಯಾ ರೈಗೆ ಆಕೆ ಎರಡು ವರ್ಷದವಳಿದ್ದಾಗ ಆಟಿಸಂ ಸ್ಪೆಕ್ಟ್ರಮ್ ಡಿಸಾರ್ಡರ್ ಮತ್ತು ಮಾತು ವಿಳಂಬದ ಸಮಸ್ಯೆಯಿಂದ ಬಳಲುತ್ತಿದ್ದಳು. ಹೀಗಾಗಿ ವೈದ್ಯರ ಸಲಹೆ ಮೇರೆಗೆ ಈಕೆಗೆ ಈಜು ತರಬೇತಿ ನೀಡಲಾಯಿತು. ಈಗ ತೆರೆದ ನೀರಿನಲ್ಲಿ ಗಂಟೆಗೆ 14 ಕಿಮೀ ವೇಗದಲ್ಲಿ ಈಜುವ ಅತ್ಯಂತ ವಿಶೇಷ ಮಹಿಳೆ ಎಂಬ ವಿಶ್ವ ದಾಖಲೆ ಬರೆದಿದ್ದಾಳೆ.

ಸಂಜೆ 5.25ಕ್ಕೆ ರಾಮೇಶ್ವರಂನ ಅರಿಚಲ್ಮುನೈ ಬೀಚ್‌ಗೆ ಆಗಮಿಸಿದ ಆಕೆಯನ್ನು ತಮಿಳುನಾಡು ಡಿಜಿಪಿ ಸಿ ಸೈಲೇಂದ್ರ ಬಾಬು ಸ್ವಾಗತಿಸಿದರು. ನಂತರ ಆಕೆಗೆ ಸ್ಮರಣಿಕೆ ನೀಡಿ ಗೌರವಿಸಿದರು.

ಈ ಸಮುದ್ರದಲ್ಲಿ ಈಜೋದು ಅಷ್ಟು ಸುಲಭವಲ್ಲ!

ಈ ಸಮುದ್ರವು ಯಾವುದೇ ಸಮುದ್ರದಂತೆ ಅಲ್ಲ; ಇದು ಉಬ್ಬರವಿಳಿತದ ಸಮುದ್ರ. ಇಲ್ಲಿನ ಸಮುದ್ರದಡಿಯಲ್ಲಿ ಪ್ರವಾಹದ ಉಪಸ್ಥಿತಿಯು ಸಮುದ್ರದ ಪರಿಚಯವಿರುವ ಜನರಿಗೂ ತಿಳಿದಿಲ್ಲ. 'ಇದು ಮಿಲ್ಕ್ ಶಾರ್ಕ್ ಎಂಬ ಅಪಾಯಕಾರಿ ಮೀನುಗಳಿಗೂ ನೆಲೆಯಾಗಿದೆ. ಅಂತೆಯೇ, ಜೆಲ್ಲಿ ಮೀನುಗಳು ಸಾಕಷ್ಟು ಇವೆ. ಇದೆಲ್ಲವನ್ನೂ ಮೀರಿ, ಪಾಕ್ ಜಲಸಂಧಿಯಲ್ಲಿ ಈಜುವುದು ದೊಡ್ಡ ಸಾಧನೆಗಳಲ್ಲಿ ಒಂದಾಗಿದೆ. ಮತ್ತು ಹಗಲಿಗಿಂತ ರಾತ್ರಿಯಲ್ಲಿ ಈಜುವುದು ತುಂಬಾ ಸುಲಭ. ಆಟಿಸಂ ಹೊಂದಿರುವ  ಯುವತಿಯೊಬ್ಬಳು ಸಮುದ್ರವನ್ನು ಈಜುವ ಈ ಸಾಧನೆ ಮಾಡಿರುವುದು ಶ್ಲಾಘನೀಯ

13 ವರ್ಷದ ಜೀಯಾ ನೌಕಾಪಡೆಯ ಮಕ್ಕಳ ಶಾಲೆಯಲ್ಲಿ ಓದುತ್ತಿದ್ದಾಳೆ. ಈಕೆಗೆ ತೆರೆದ ನೀರಿನ ಈಜು ವಿಭಾಗದ ಅಡಿಯಲ್ಲಿ 18 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ನಾಗರಿಕರಿಗೆ ಭಾರತ ಸರ್ಕಾರ ನೀಡುವ ಅತ್ಯುನ್ನತ ಪ್ರಶಸ್ತಿಯಾದ  ಪ್ರಧಾನ ಮಂತ್ರಿ ರಾಷ್ಟ್ರೀಯ ಬಾಲ ಪುರಸ್ಕಾರ್ 2022 ಅನ್ನು ನೀಡಲಾಗಿದೆ. ಕಳೆದ ವರ್ಷ, ಜಿಯಾ ಅವರು ಬಾಂದ್ರಾ-ವರ್ಲಿ ಸೀ ಲಿಂಕ್‌ನಿಂದ ಗೇಟ್‌ವೇ ಆಫ್ ಇಂಡಿಯಾದವರೆಗೆ 36 ಕಿಮೀ ದೂರ ಸಮುದ್ರವನ್ನು 8 ಗಂಟೆ 40 ನಿಮಿಷಗಳಲ್ಲಿ ಈಜುವ ಮೂಲಕ ಇತಿಹಾಸ ನಿರ್ಮಿಸಿದ್ದಳು. ನಿಜಕ್ಕೂ ಈಕೆಯ ಸಾಧನೆ ಎಲ್ಲರಿಗೂ ಸ್ಫೂರ್ತಿ.