NEWS: ಜ್ಯೋತಿಷ್ಯ ಹೇಳುವ ನೆಪದಲ್ಲಿ ವ್ಯಕ್ತಿಯೊಬ್ಬರ ಬದುಕನ್ನೇ ಮೂರಾಬಟ್ಟೆ ಮಾಡಿದ್ದು ಮಾತ್ರವಲ್ಲದೆ, ಬರೋಬ್ಬರಿ 2 ಕೋಟಿ ವಂಚಿಸಿದ ಪ್ರಕರಣವೊಂದು ಉತ್ತರ ಪ್ರದೇಶದ ಹಜ್ರತ್​ಗಂಜ್​ನಲ್ಲಿ ನಡೆದಿದೆ. ಇಂಥ ಬಹುದೊಡ್ಡ ವಂಚನೆಯೊಂದರೆ ಸೂತ್ರಧಾರಿ ಪೂಜಾ ಅಲಿಯಾಸ್ ರೀನಾ ಶ್ರೀವಾಸ್ತವ್. ಈಕಗೆ ಜೊತೆಯಾಗಿದ್ದವರು ಈಕೆಯ ಸಹೋದರ ಅಮನ್ ಶ್ರೀವಾಸ್ತವ್ ಮತ್ತು ಸಹೋದರಿ ಆರತಿ ಶ್ರೀವಾಸ್ತವ್. ರೀನಾ ವಿರುದ್ಧ ದೂರು ದಾಖಲಿಸಿರುವ ವ್ಯಕ್ತಿ, ತಾನು ಹೇಗೆ ಈಕೆಯಿಂದ ಪೂರ್ತಿಯಾಗಿ ಹಿಪ್ನೋಟಿಸಮ್​ಗೆ ಒಳಗಾಗಿ ಸಂಪೂರ್ಣ ಬದುಕನ್ನೇ ಹಾಳುಮಾಡಿಕೊಂಡೆ ಎಂಬುದನ್ನು ವಿವರಿಸಿದ್ದಾರೆ. ಖಿನ್ನತೆಯಿಂದ ಬಳಲುತ್ತಿದ್ದ ಆ ವ್ಯಕ್ತಿ ಈಕೆಯನ್ನು ಮೊದಲ ಬಾರಿಗೆ ಸಂಪರ್ಕಿಸಿದ್ದು 2014ರಲ್ಲಿ. ಆತನ ಜಾತಕವು ತುಂಬ ಕೆಟ್ಟದ್ದಾಗಿದೆ ಎಂದು ಹೇಳಿ, ಅಲ್ಲಿಂದಲೇ ಆ ವ್ಯಕ್ತಿಯ ಮನಸ್ಸಿನಲ್ಲಿ ಪೂರ್ತಿ ಭಯವನ್ನು ತುಂಬಲಾಯಿತು. 2016ರ ಅಂತ್ಯದವರೆಗೂ ಆತನನ್ನು ನಿತ್ಯ ಹಲವು ಗಂಟೆಗಳ ಕಾಲ ಆಶ್ರಮಕ್ಕೆ ಕರೆಸಿಕೊಂಡು ಅತ್ಯಂತ ಕಠಿಣ ರೀತಿಯ ಪರಿಹಾರೋಪಾಯಗಳನ್ನು ಹೇಳುವುದು ನಡೆಯಿತು. ಉದಾಹರಣೆಗೆ, ದೇವಾಲಯಕ್ಕೆ ಹೋಗುವಾಗ ಸಾವಿರ ಬಾರಿ ಪ್ರಾಣಿಗಳಿಗೆ ಆಹಾರ ತಿನ್ನಿಸಬೇಕು ಮೊದಲಾದ, ಪೂರೈಸಲಿಕ್ಕೇ ಆಗದಂಥ ಪರಿಗಾರೋಪಾಯಗಳು ಅವಾಗಿದ್ದವು. 2016ರ ನಂತರ ಆಕೆ ಆ ಆಸ್ರಮ ಬಿಟ್ಟು ಫೋನ್ ಮೂಲಕ ಸಂಪರ್ಕಿಸಲು ಶುರು ಮಾಡಿದ್ದಳು. ಆದರೆ ಭೇಟಿಗೆಅವಕಾಶ ಕೇಳಿದರೆ ಒಮ್ಎಯೂ ವಿಳಾಸ ಕೊಡದೇ ಸತಾಯಿಸಿದ್ದಳು. ಆ ವ್ಯಕ್ತಿಯಂತೂ ಹಿಪ್ನೋಟಿಸಮ್​ಗೆ ಒಳಗಾದವನಂತೆ, ಬ್ಲ್ಯಾಕ್​ಮೇಲ್​ಗೆ ತುತ್ತಾಗಿರುವಂತೆ, ತುಂಬ ಒತ್ತಡದಲ್ಲಿರುವಂತೆ ವಿಚಿತ್ರ ಸಂಕಟ ಅನುಭವಿಸುವಂತಾಯಿತು. ಐದು ಬಾರಿನಾನು ನಗರದಿಂದ ನಗರಕ್ಕೆ ಮನೆಯಿಂದ ಮನೆಗೆ ವಾಸ್ತವ್ಯ ಬದಲಾಯಿಸಿದೆ. ಆಕೆ ಹೇಳಿದಂತೆ ಯಾವ ಕೆಲಸವೂ ನನಗೆ ದೊರೆಯಲಿಲ್ಲ. ಯಾವ ಒಳ್ಳೆಯ ಪರಿಹಾರವೂ ಆಕೆಯಿಂದ ಇಲ್ಲಿಯವರೆಗೂ ನನಗೆ ಒದಗಲಿಲ್ಲ ಎಂದು ಆ ವ್ಯಕ್ತಿ ದೂರಿದ್ದಾರೆ. ಹಣ ಕಳೆದುಕೊಂಡದ್ದು ಮಾತ್ರವೇ ಪೂಜಾ ಅಲಿಯಾಸ್ ರೀನಾ ಶ್ರೀವಾಸ್ತವ್ ಎಂಬ ಜ್ಯೋತಿಷಿಯ ಸೋಗಿನಲ್ಲಿರುವ ಆಕೆಯಿಂದ ಆ ವ್ಯಕ್ತಿಗೆ ಸಿಕ್ಕ ಫಲ. ಜನರ ಮಾನಸಿಕ ದೌರ್ಬಲ್ಯವನ್ನೇ ಬಂಡವಾಳ ಮಾಡಿಕೊಂಡು, ಅವರನ್ನು ಭಯದಲ್ಲಿಟ್ಟು ವಂಚಿಸುತ್ತ ಹಣ ಮಾಡಿಕೊಳ್ಳುವ ಇಂಥವರ ಸಂಖ್ಯೆ ದೊಡ್ಡದೇ ಇದೆ. ಆದರೆ ಕೋಟಿಗಟ್ಟಲೆ ಹಣ ಕಿತ್ತಿರುವ ಈಕೆಯ ಚಮತ್ಕಾರ ಮಾತ್ರ ಎಲ್ಲರನ್ನೂ ಮೀರಿಸುವ ಹಾಗಿದೆ.