SPECIAL:

ನವದೆಹಲಿ: ಕೊರೊನಾದಿಂದ ಪಾತಾಳಕ್ಕೆ ಆದಾಯ ಕುಸಿದ ಹಿನ್ನೆಲೆಯಲ್ಲಿ ಮಕ್ಕಳ ವಿದ್ಯಾಭ್ಯಾಸ, ದಿನ ನಿತ್ಯದ ಜೀವನ ನಿರ್ವಹಣೆಗಾಗಿ ಬಾಡಿಗೆ ತಾಯಂದಿರಾಗುವವರ ಸಂಖ್ಯೆ ಹೆಚ್ಚುತ್ತಿದೆ ಎಂದು ಅಧ್ಯಯನ ವರದಿಗಳು ಬಹಿರಂಗಪಡಿಸಿವೆ.

ಸಾಂಕ್ರಾಮಿಕ ಪಿಡುಗು ಹೆಚ್ಚಾದ ಬಳಿಕ ಅದರಲ್ಲೂ ಎರಡನೇ ಹಂತದ ಅಲೆಯ ಬಳಿಕ ಈ ಬೆಳವಣಿಗೆ ಕಂಡುಬಂದಿದೆ. ಹೈದರಾಬಾದ್ ನಲ್ಲಿರುವ ಇಂತಹ ಸರೋಗೆಸಿ ಕೇಂದ್ರಕ್ಕೆ ಅಂಡಾಣು ದಾನಿಗಳು ಅಥವಾ ಬಾಡಿಗೆ ತಾಯಂದಿರಾಗಲು ಬರುವವರ ಸಂಖ್ಯೆ ದಾಖಲೆ ಪ್ರಮಾಣದಲ್ಲಿ ಹೆಚ್ಚಿದೆ ಅಲ್ಲಿನ ಉನ್ನತ ಮೂಲಗಳು ತಿಳಿಸಿವೆ.

ಈ ಹಿಂದೆ ದಿನಕ್ಕೆ ಈ ಕುರಿತು ವಿಚಾರಣೆ ನಡೆಸಲು ದೂರವಾಣಿ ಕರೆ ಮಾಡುವವರ ಸಂಖ್ಯೆ ಗರಿಷ್ಠವೆಂದರೆ ಎರಡು ಇದ್ದರೆ ಈಗ ಅದು ಕನಿಷ್ಠವೆಂದರೂ ಹತ್ತು ಆಗಿದೆ ಎಂದು ಮೂಲಗಳು ವಿವರಿಸಿವೆ. ಕೇಂದ್ರವು ನಡೆಸಿದ 100 ಮಹಿಳೆಯರ ಸಮೀಕ್ಷೆಯಲ್ಲಿ ಬಹುತೇಕರು ಪತಿಯ ಆದಾಯ ಕುಸಿತದ ಕಾರಣದಿಂದಲೇ ಬಾಡಿಗೆ ತಾಯಂದಿರಾಗಲು ಮುಂದಾಗಿದ್ದಾರೆ ಎಂದು ತಿಳಿದು ಬಂದಿದೆ. ಬಾಡಿಗೆ ತಾಯಂದಿರಾಗು ಮೂಲಕ 5ರಿಂದ 6 ಲಕ್ಷ ರೂ. ಸಂಪಾದಿಸಬಹುದಾಗಿದೆ. ಅಲ್ಲದೆ ನಿರ್ದಿಷ್ಟ ಅವಧಿಗೆ ಅಂದರೆ ಗರ್ಭವತಿಯಾದ ಸಂದರ್ಭದಲ್ಲಿ ಅವರ ಪೌಷ್ಠಿಕತೆ ಸೇರಿದಂತೆ ಎಲ್ಲಾ ಔಷಧ ಮತ್ತು ಆಹಾರ ವ್ಯವಸ್ಥೆಯನ್ನು ಆಸ್ಪತ್ರೆಗಳೇ ನೋಡಿಕೊಳ್ಳುತ್ತವೆ. ಒಟ್ಟಾರೆಯಾಗಿ ಈ ಪ್ರಕ್ರಿಯೆಗೆ 25 ಲಕ್ಷ ರೂ. ವೆಚ್ಚವಾಗುತ್ತದೆ. ಅದನ್ನು ಮಗು ಬಯಸಿದವರು ಭರಿಸುತ್ತಾರೆ. ಇತ್ತೀಚೆಗೆ ಇಂತಹ ಕ್ರಮದಿಂದ ಮಗುವನ್ನು ಪಡೆದವರು ಬಾಡಿಗೆ ತಾಯಿಯ ಮೊದಲ ಮಗುವಿಗೆ ಐಪಾಡ್ ನ್ನು ಉಡುಗೊರೆಯಾಗಿ ಕೂಡ ನೀಡಿದ್ದರು ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ.

ಇದರಿಂದ ಆದಾಯ ಪಡೆಯೆಲು ಮಹಿಳೆ ಶಕ್ತವಾಗಿದ್ದರೂ ಭಾರತದಲ್ಲಿ ವಾಣಿಜ್ಯ ಉದ್ದೇಶಕ್ಕೆ ಬಾಡಿಗೆ ತಾಯಂದಿರಾಗುವುದನ್ನು ನಿಷೇಧಿಸಲಾಗಿದೆ. 2019ರಲ್ಲಿ ಸಂಸತ್ತಿನಲ್ಲಿ ಮಂಡನೆಯಾಗಿರುವ ಬಾಡಿಗೆ ತಾಯಂದಿರ ನಿಯಂತ್ರಣ ವಿಧೇಯಕದಲ್ಲಿ ತೀರಾ ಹತ್ತಿರದ ಸಂಬಂಧಿಗಳಿಗೆ ಮಾತ್ರ ಇಂತಹ ಅವಕಾಶ ಒದಗಿಸಲಾಗಿದೆ. ಆದರೆ ಇದಕ್ಕೆ ರಾಜ್ಯಸಭೆಯ ಒಪ್ಪಿಗೆ ಇನ್ನಷ್ಟೇ ಸಿಕ್ಕಬೇಕಿದೆ. ಸದ್ಯದ ಮಟ್ಟಿಗೆ ಇದು ಸುಮಾರು 400 ಮಿಲಿಯನ್ ಡಾಲರ್ ವ್ಯವಹಾರ ಎಂದು ಅಂದಾಜಿಸಲಾಗಿದೆ.