SPORTS:

ಪ್ರೊ ಕಬಡ್ಡಿ ಎಂಟನೇ ಆವೃತ್ತಿಯ ಚಾಂಪಿಯನ್ ಪಟ್ಟವನ್ನು ದಬಾಂಗ್ ದೆಹಲಿ ತಂಡವನ್ನು ಅಲಂಕರಿಸಿದೆ. ಈ ಮೂಲಕ ಚೊಚ್ಚಲ ಬಾರಿಗೆ ದೆಹಲಿ ಕಪ್ ಎತ್ತಿ ಸಂಭ್ರಮಿಸಿದೆ. ನಾಲ್ಕನೇ ಬಾರಿಗೆ ಕಪ್ ಗೆ ಮುತ್ತಿಡುವ ಪಾಟ್ನಾ ಪ್ರಯತ್ನ ವಿಫವಲಾಗಿದೆ.

ಕೊನೆಯ ಕ್ಷಣದ ವರೆಗೂ ರೋಚಕತೆ ಹುಟ್ಟಿಸಿದ್ದ ಪಂದ್ಯದಲ್ಲಿ ದಬಾಂಗ್ ಸಮಯೋಚಿತ ಆಟವಾಡಿ ಜಯ ದಾಖಲಿಸಿದೆ. ಒಂದು ಅಂಕಗಳಿಂದ ಮೂರು ಬಾರಿ ಚಾಂಪಿಯನ್ ಪಾಟ್ನಾ ತಂಡವನ್ನು ಮಣಿಸಿದ ದೆಹಲಿ ಅಬ್ಬರಿಸಿದೆ.

ದಬಾಂಗ್ ತಂಡದ ಸ್ಟಾರ್ ಆಟಗಾರ ನವೀನ್ ಕುಮಾರ್ ಪ್ರಸಕ್ತ ಟೂರ್ನಿಯಲ್ಲಿ 300ಕ್ಕೂ ಹೆಚ್ಚು ಅಂಕಗಳನ್ನು ಕಲೆ ಹಾಕಿ ಮಿಂಚಿದರು. ಫೈನಲ್ ಪಂದ್ಯದಲ್ಲಿ ನವೀನ್ ಕುಮಾರ್ 13 ಅಂಕಗಳನ್ನು ಕಲೆ ಹಾಕಿದರು. ಆಲ್ ರೌಂಡರ್ ವಿಜಯ್ ಎರಡು ಬಾರಿ ಸೂಪರ್ ರೈಡ್ ಸೇರಿದಂತೆ 14 ಅಂಕ ಸೇರಿಸಿ ಜಯದಲ್ಲಿ ಮಿಂಚಿದರು. ಪಾಟ್ನಾ ಪರ ಸಚಿನ್ 10, ಗುಮಾನ್ ಸಿಂಗ್ 9 ಅಂಕ ಕಲೆ ಹಾಕಿ ಸೋಲಿನಲ್ಲಿ ಮಿಂಚಿದರು.

ಮೊದಲಾವಧಿಯ ಪಂದ್ಯದಲ್ಲಿ ಪಾಟ್ನಾ ಪೈರೇಟ್ಸ್ ತಂಡ 17-15ರಿಂದ ಮುನ್ನಡೆ ಸಾಧಿಸಿತು. ಈ ಅವಧಿಯಲ್ಲಿ ಪಾಟ್ನಾ ಹಾಗೂ ದಬಾಂಗ್ ತಂಡಗಳು 12 ಅಂಕಗಳನ್ನು ರೈಡ್ ನಲ್ಲಿ ಕಲೆ ಹಾಕಿದವು.

ಎರಡನೇ ಅವಧಿಯ ಆಟದಲ್ಲಿ ಭರ್ಜರಿ ಪ್ರದರ್ಶನ ನೀಡಿ ಪುಟಿದೆದ್ದ ದಬಾಂಗ್ ದೆಹಲಿ ಅಂಕಗಳಿಕೆಗೆ ಚುರುಕು ಮುಟ್ಟಿಸಿತು. ಈ ಅವಧಿಯಲ್ಲಿ ದಬಾಂಗ್, ಪಾಟ್ನಾ ತಂಡದ ರಣ ತಂತ್ರವನ್ನು ಮೆಟ್ಟಿ ನಿಂತು ಆಟವಾಡಿತು. 28ನೇ ನಿಮಿಷದಲ್ಲಿ ಪಾಟ್ನಾ ಪೈರೇಟ್ಸ್ ಆಲೌಟ್ ಆಯಿತು. ದೆಹಲಿ ತಂಡದ ಪರ 37ನೇ ನಿಮಿಷದಲ್ಲಿ ಹಾಗೂ ಇದಕ್ಕೂ ಮೊದಲು ಸೂಪರ್ ರೈಡ್ ಮಾಡಿ ಅಂಕಗಳನ್ನು ಹಿಗ್ಗಿಸಿದರು.