POLITICS:

ಎಂ ಹೈದರ್

ದೇಶದಲ್ಲಿ ಕೋವಿಡ್ ಮಹಾಮಾರಿಯಿಂದ ಸಂಕಷ್ಟದ ಸ್ಥಿತಿಯನ್ನು ಎದುರಿಸುತ್ತಿರುವ ಈ ಸಂದರ್ಭದಲ್ಲಿ ಕೇಂದ್ರದ ಮಂತ್ರಿಮಂಡಲ ಪುನಾರಚನೆ ಆಗಿರುವುದು ದೇಶದ ಆರ್ಥಿಕ ಪರಿಸ್ಥಿತಿಯನ್ನು ಹಳಿಗೆ ತರುವುದಕ್ಕಾಗಲಿ ಅಥವಾ ಕೋವಿಡ್ ಪರಿಸ್ಥಿತಿಯನ್ನು ಸಮರ್ಥವಾಗಿ ನಿಭಾಯಿಸುವ ಸಲುವಾಗಿ ಅಲ್ಲ. ಗಗನಕ್ಕೇರಿದ ಅಗತ್ಯ ವಸ್ತುಗಳ ಬೆಲೆಗಳನ್ನು ಇಳಿಸಲಂತೂ ಅಲ್ಲವೇ ಅಲ್ಲ. ಅಸಲಿಗೆ ಕೇಂದ್ರ ಸಂಪುಟವನ್ನು ವಿಸ್ತರಿಸಿರುವುದು ಉತ್ತರ ಪ್ರದೇಶದಲ್ಲಿ ಮುಂದಿನ ವರ್ಷ ನಡೆಯಲಿರುವ ವಿಧಾನಸಭಾ ಚುನಾವಣೆಯ ದೃಷ್ಟಿಯಿಂದ. ಉತ್ತರ ಪ್ರದೇಶದಿಂದ ಮತ್ತೆ 7 ಸಂಸದರನ್ನು ಕೇಂದ್ರ ಸಂಪುಟಕ್ಕೆ ಸೇರಿಸಿಕೊಳ್ಳಲಾಗಿದೆ.

ಈವರೆಗೆ ನರೇಂದ್ರ ಮೋದಿ ಸಂಪುಟದಲ್ಲಿ ಸಚಿವರಾಗಿ ಉತ್ತರ ಪ್ರದೇಶದ ಆರು ಮಂದಿ ಇದ್ದರು. ರಾಜನಾಥ್ ಸಿಂಗ್, ಜನರಲ್ ವಿ.ಕೆ.ಸಿಂಗ್, ಮಹೇಂದ್ರ ನಾಥ್ ಪಾಂಡೆ, ಕೃಷನ್ ಪಾಲ್, ಸಂಜೀವ್ ಬಲ್ಯಾನ್ ಮತ್ತು ಸಾಧ್ವಿ ನಿರಂಜನ್ ಜ್ಯೋತಿ, ಕೇಂದ್ರ ಸಂಪುಟದ ಹಾಲಿ ಸಚಿವರು. ಸಂಪುಟ ಪುನಾರಚನೆಯೊಂದಿಗೆ ಉತ್ತರ ಪ್ರದೇಶದ ಅನುಪ್ರಿಯಾ ಪಟೇಲ್, ಪಂಕಜ್ ಚೌಧರಿ, ಅಜಯ್ ಕುಮಾರ್, ಸತ್ಯಪಾಲ್ ಸಿಂಗ್ ಬಘೆಲ್, ಭಾನು ಪ್ರತಾಪ್ ಸಿಂಗ್ ವರ್ಮಾ, ಕೌಶಲ್ ಕಿಶೋರ್, ಮತ್ತು ಬಿ.ಎಲ್.ವರ್ಮಾ ಅವರು ಮೋದಿ ತಂಡ ಸೇರಿಕೊಂಡಿದ್ದಾರೆ.

ಈಗ ಮೋದಿ ಸಂಪುಟದಲ್ಲಿ ಉತ್ತರ ಪ್ರದೇಶದವರ ಸಂಖ್ಯೆ 13ಕ್ಕೆ ತಲುಪಿದೆ. ಪ್ರಧಾನಿ ಮೋದಿ ಪ್ರತಿನಿಧಿಸುವ ಲೋಕಸಭಾ ಕ್ಷೇತ್ರವೂ ಉತ್ತರ ಪ್ರದೇಶದ ವಾರಾಣಸಿ. ಒಟ್ಟಿನಲ್ಲಿ ಇವರೆಲ್ಲ ಮುಂದಿನ ವರ್ಷದ ಉತ್ತರ ಪ್ರದೇಶದ ವಿಧಾನಸಭಾ ಚುನಾವಣೆಯನ್ನು ಗೆಲ್ಲಲು ಅವಿರತವಾಗಿ ಶ್ರಮಿಸಲಿದ್ದಾರೆ.

ಇದಕ್ಕೆಂದೇ, ಜಾತಿ ಆಧಾರದಲ್ಲಿ ಸಮುದಾಯಗಳನ್ನು ಓಲೈಸಲು ಸಂಪುಟ ವಿಸ್ತರಣೆಯಲ್ಲಿ ಕಸರತ್ತು ನಡೆಸಲಾಗಿದೆ. ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡಗಳಿಗೆ 20 ಹಿಂದುಳಿದ ವರ್ಗಗಳಿಗೆ 27 ಸ್ಥಾನ ಹಂಚಿಕೆಯಾಗಿದೆ.

ನೂತನ ಸಚಿವರಲ್ಲಿ ಕರ್ನಾಟಕ, ಮಹಾರಾಷ್ಟ್ರ, ಪಶ್ಚಿಮ ಬಂಗಾಳಗಳಿಂದ ತಲಾ ನಾಲ್ಕು, ಗುಜರಾತ್​ನಿಂದ ಮೂವರು, ಮಧ್ಯ ಪ್ರದೇಶ ಮತ್ತು ಬಿಹಾರದಿಂದ ತಲಾ ಇಬ್ಬರು ಇದ್ದಾರೆ. ರಾಜಸ್ಥಾನ ಮತ್ತು ಅಸ್ಸಾಂಗೆ ತಲಾ ಒಂದು ಸಚಿವ ಸ್ಥಾನ ದೊರೆತಿದೆ.

ಮೋದಿ ಸಂಪುಟದಲ್ಲಿ ಸಚಿವ ಸ್ಥಾನ ಹೊಂದಿದವರೆಲ್ಲ ಹೆಸರಿಗಷ್ಟೆ ಮಂತ್ರಿಗಳು.
ಯಾವುದೇ ಖಾತೆ ಯಾರ ಬಳಿಯೇ ಇದ್ದರೂ ಎಲ್ಲ ಪ್ರಮುಖ ನಿರ್ಧಾರಗಳನ್ನು ತೆಗೆದುಕೊಳ್ಳುವುದು ಮೋದಿ ಮತ್ತು ಅಮಿತ್ ಶಾ ಜೋಡಿಯೇ. ಇದು ದೇಶದ ಜನರಿಗೆ ಕಳೆದ ಏಳು ವರ್ಷಗಳಿಂದಲೂ ಗೊತ್ತಿರುವ ವಿಚಾರವೇ ಆಗಿದೆ. ಕೇವಲ ಚುನಾವಣೆಗಾಗಿ ವಿವಿಧ ಸಮುದಾಯಗಳ ನಾಯಕರು ಮಂತ್ರಿಗಳಾಗಿದ್ದಾರೆ.

ಎಲ್ಲ ರಂಗಗಳಲ್ಲೂ ವಿಫಲವಾಗಿರುವ ಮೋದಿ ಸರ್ಕಾರಕ್ಕೆ ಉಳಿದಿದ್ದು ಸಧ್ಯಕ್ಕೆ ಇದೊಂದೇ ದಾರಿಯಾಗಿತ್ತು. ಉತ್ತರ ಪ್ರದೇಶ ಮತ್ತು ಮುಂದೆ ಬರುವ ಇತರ ರಾಜ್ಯಗಳ ವಿಧಾನ ಸಭಾ ಚುನಾವಣೆಯಲ್ಲಿ ಜನರ ಗಮನವನ್ನು ಸೆಳೆಯಲು. ಸರ್ಕಾರಕ್ಕೆ ಈ ವಿಸ್ತರಣೆ ಅನಿವಾರ್ಯವಾಗಿತ್ತು. ಆದರೆ ಇದು ಎಷ್ಟರಮಟ್ಟಿಗೆ ವರ್ಕೌಟ್ ಆಗಲಿದೆ ಎಂಬುದು ಉತ್ತರ ಪ್ರದೇಶದ ಚುನಾವಣೆಯಲ್ಲಿ ನಿರ್ಧಾರವಾಗಲಿದೆ.

2014 ಮತ್ತು 2019ರಂತೆ ಮುಂದಿನ ದಿನಗಳಲ್ಲಿ ಮೋದಿಯ ಮುಖ ನೋಡಿ ಮತ ಹಾಕುವವರು ಇಲ್ಲ ಎಂಬುದು ಬಿಜೆಪಿಗೆ ಅರಿವಾಗಿದೆ. ಅದ್ದರಿಂದ ಜಾತಿ ಮತ್ತು ಪ್ರಾಂತ್ಯದ ಲೆಕ್ಕಾಚಾರ ಮತ್ತು ಸಣ್ಣಪುಟ್ಟ ಪಕ್ಷಗಳ ಆಸರೆಯೊಂದಿಗೆ ಸಂಪುಟ ಪುನಾರಚನೆ ಆಗಿರುವುದು ಗೋಚರವಾಗುತ್ತಿದೆ. ಒಟ್ಟಿನಲ್ಲಿ ಮುಂದಿನ ಚುನಾವಣೆಗಳನ್ನು ಎದುರಿಸುವ ಬಗ್ಗೆ ಮೋದಿ ಮತ್ತು ಅಮಿತ್ ಶಾರಲ್ಲಿ ಇರುವ ಅಳುಕು ಈ ಸಂಪುಟ ಪುನಾರಚನೆಯಲ್ಲಿ ಎದ್ದು ಕಾಣುತ್ತಿದೆ.