DISTRICT:

ಗೊರೂರು ಪಂಕಜ, ಹಾಸನ ಜಿಲ್ಲೆಯ ಗೊರೂರಿನವರು. ಕೇಳಬೇಕೆ. ಅದು ಗೊರೂರು ರಾಮಸ್ವಾಮಿ ಅಯ್ಯಂಗಾರರರಂತಹ ಶ್ರೇಷ್ಠ ಸಾಹಿತಿ ಹುಟ್ಟಿದ ನೆಲ. ಅದೇ ಊರಿನಲ್ಲಿ ಜನಿಸಿದ ಪಂಕಜಾ ಸಾಹಿತ್ಯ ಕ್ಷೇತ್ರದಲ್ಲಿ ಸಾಧಿಸಿದ್ದು ಅಪಾರ. ಅಂತಹ ಸಾಧಕಿಯ ಸಾಧನೆಯನ್ನ ಗುರುತಿಸಿರುವ ಭಾರತರತ್ನ ಸರ್. ಎಂ. ವಿಶ್ವೇಶ್ವರಯ್ಯ ಇಂಜಿನಿಯರಿಂಗ್ ಪ್ರತಿಷ್ಠಾನ ಬೆಂಗಳೂರಿನ ರವೀಂದ್ರ ಕಲಾಕ್ಷೇತ್ರದಲ್ಲಿ ನಡೆದ ಜನಪದ ಸಂಭ್ರಮ ಕಾರ್ಯಕ್ರಮದಲ್ಲಿ "ಕರ್ನಾಟಕ ವಿಭೂಷಣ" ರಾಜ್ಯ ಪ್ರಶಸ್ತಿಯನ್ನು ನೀಡಿ ಗೌರವಿಸಿದೆ.

ಇಂತಹ ಪ್ರಶಸ್ತಿಗೆ ಪಾತ್ರರಾಗಿರುವ ಈ ಲೇಖಕಿಯ ಬಗ್ಗೆ ಎರಡು ಸಾಲಿನಲ್ಲಿ ಹೇಳಿ ಮುಗಿಸುವಂತಹದ್ದಲ್ಲ.
ಗೊರೂರು ಪಂಕಜ ಅವರು, ಬರಹಗಾರ್ತಿ, ಕವಿಯತ್ರಿ, ಪತ್ರಕರ್ತೆ, ಸ್ತ್ರೀ ಸಂವೇದನೆಯ ಸಾಮಾಜಿಕ ಕಾರ್ಯಕರ್ತೆ, ಸ್ತ್ರೀ ಶಕ್ತಿ- ಸ್ವಸಹಾಯ ಗುಂಪುಗಳ ಸಂಘಟಕಿ, ಕಾರ್ಯಕ್ರಮಗಳ- ವಿಶೇಷವಾಗಿ ಸಾಂಸ್ಕೃತಿಕ ಸಾಹಿತ್ಯಿಕ, ಸಾಮಾಜಿಕ ಕಾರ್ಯಕ್ರಮಗಳ ನಿರೂಪಕಿ ಇತ್ಯಾದಿ ಕ್ಷೇತ್ರದಲ್ಲಿ ನಿರಂತರ ಸೇವೆ ಸಲ್ಲಿಸುತ್ತಾ ಬಂದಿದ್ದಾರೆ. ವಿವಿಧ ಕ್ಷೇತ್ರಗಳಲ್ಲಿ ಪ್ರಾಮಾಣಿಕ ಮತ್ತು ದಕ್ಷ ‘ಕಾಯಕ’ ಗಳಿಂದಾಗಿ ಇವರನ್ನರಸಿಕೊಂಡು ಬಂದ ಪ್ರಶಸ್ತಿ-ಪುರಸ್ಕಾರ, ಗೌರವಗಳಿಗೆ ಲೆಕ್ಕವಿಲ್ಲ. 2008ರಲ್ಲಿ ಇವರ ವಿವಿಧ ಕ್ಷೇತ್ರಗಳ ಸೇವೆ ಮತ್ತು ಸಾಹಿತ್ಯಕ್ಕಾಗಿ ಒಂದೇ ವರ್ಷದಲ್ಲಿ ಸುಮಾರು 14 ಪ್ರಶಸ್ತಿಗಳನ್ನು ಗಳಿಸಿದ ಏಕೈಕ ಲೇಖಕಿ ಎಂದರೆ ತಪ್ಪಾಗಲಾರದು.

ಗೊರೂರು ಪಂಕಜ ಅವರು ಆಕಾಶವಾಣಿ ಕಲಾವಿದೆಯಾಗಿಯೂ ಕಳೆದ 20 ವರ್ಷಗಳಿಂದ ನಿಯಮಿತವಾಗಿ ಕಾರ್ಯಕ್ರಮಗಳನ್ನು ನೀಡುತ್ತಿದ್ದಾರೆ. ದೂರದರ್ಶನ ಮತ್ತು ಸ್ಥಳೀಯ ಚಾನಲ್ ಗಳಲ್ಲೂ ಕಾರ್ಯಕ್ರಮ ನೀಡಿದ್ದಾರೆ. ಈ ಕಿರಿಯ ವಯಸ್ಸಿಗೆ ಮಾಡಿರುವ ಸಾಧನೆ ಅಪಾರವಾದದ್ದು. ಇಂತಹ ಸಾಧನೆಗೆ ಅವರಿಗೆ ಕರ್ನಾಟಕ ವಿಭೂಷಣ ಪ್ರಶಸ್ತಿ ಲಭಿಸಿದ್ದು ಸಮಂಜಸವೇ.

ಕಾರ್ಯಕ್ರಮದಲ್ಲಿ ವಿಶ್ವ ಒಕ್ಕಲಿಗರ ಮಹಾಸಂಸ್ಥಾನ ಮಠದ ಚಂದ್ರಶೇಖರನಾಥ ಸ್ವಾಮೀಜಿ, ಸಾರ್ವಜನಿಕ ಗ್ರಂಥಾಲಯ ಇಲಾಖೆಯ ನಿರ್ದೇಶಕರಾದ ಸತೀಶ್ ಕುಮಾರ್ ಹೊಸಮನಿ, ಲೇಖಕಿ ವಸುಂಧರಾ ಭೂಪತಿ, ಸುರ್ವೆ ಪತ್ರಿಕೆಯ ಸಂಪಾದಕರಾದ ಮಹೇಶ್ ಸುರ್ವೆ ಮತ್ತಿತರ ಗಣ್ಯರು ಉಪಸ್ಥಿತರಿದ್ದರು.